A Chumaraigh Aoibhinn Ó

Mo bheannacht ó chroí dod' thír's dod' shléibhtibh
 A Chumaraigh Aoibhinn, Ó.
 'S dod' mhuintir shuairc ar dual dóibh féile
 A Chumaraigh Aoibhinn, Ó.
 Do shrutháin gheala's do choillte craobhach,
 Do ghleannta meala's do bhánta léire,
 Ó, grá mo chroí iad súd le chéile.
 A Chumaraigh Aoibhinn,Ó.
 

 Is dathúil breá do chruacha scéimh-chruth
 A Chumaraigh Aoibhinn Ó
 Nuair a lasaid suas le h-amharc gréine,
 A Chumaraigh Aoibhinn, Ó
 Na faillte's leacain ar gach taobh díot
 Mar bhrata sróill le seodaibh gléasta
 Nuair scaipeann an drúcht anuas ón spéir ort,
 A Chumaraigh Aoibhinn, Ó
 

 Is líonmhar lán do shrutháin ghléigeal,
 a Chumaraigh Aoibhinn, Ó,
 Ag rith anuas go luath le taobh chnoic
 A Chumaraigh Aoibhinn, Ó,
 An Mhachain thall's i bhfos an Tae dhil
 Mar mhionnáin gabhair le spórt is scléip-shult
 Ag snámh anonn ód bhonn go tréan-mhuir.
 A Chumaraigh Aoibhinn, Ó
 

 Is fairsing fial do locha taosach
 A Chumaraigh Aoibhinn, Ó,
 Fé iasc ná fuil a shamhailt i nÉirinn,
 A Chumaraigh Aoibhinn, Ó,
 Loch Com Seangán na hollapheiste
 An dá Sciollog ina mbíonn an meithbhreac,
 Na Coma-locha is Com Fiadh' taobh leo
 A Chumaraigh Aoibhinn, Ó.
 

 Is breá é an radharc a chím gach taobh díot,
 A Chumaraigh Aoibhinn, Ó,
 Ó thuaidh's ó dheas is soir i n-éineacht,
 A Chumaraigh Aoibhinn, Ó,
 Ó Dhrom Fhinghín i lár na nDéise
 Go Corrach Mór i dtír na bPaorach
 'S as san ó thuaidh go Sliabh Ban Féinne,
 A Chumaraigh Aoibhinnm Ó.  
 

 Do bhíos thar sáile seal i gcéin uait,
 A Chumaraigh aoibhinn, Ó,
 I nduthaigh fáin ag déanamh saothair,
 A Chumaraigh Aoibhinn, Ó,
 ach b'obair tháir liom cnuasach gréithre
 I bhfad óm áit fé scáil do shléibhte
 'S chas me 'rís ort, a phlúr na nDéise,
 A Chumaraigh Aoibhinn, Ó.

Taifeadtaí

• Idir Dhá Chomhairle – Áine Uí Cheallaigh