Ar mo Ghabháilt Dom

Ar mo ghabháilt dom tríd an mbaile beag darb' ainm dó siúd Éire,
 Preabann agus léimeann an osna so im' chroí
 Nuair a chuimhním ar an aimsir go mbínnse féin agus mo chéad searc
 Ar imeall coille craobhaí go socair 'nár suí.
 Bhí dóthain don Diúic ann do phrionsa nó dá chéile
 'S gach ní eile dá mb'fhéidir go dtiocfaidh 'nár líon,
 An bradán geal go dtabharfad ón linn seo atá 'muigh taobh linn
 Lachain agus géanna 'gus cearca beaga fraoigh.
 

 Is pé acu bean ar buile mé, nó fé mar atáimse
 Ceolta sí na Spáinne ní cheapaim go bhfuil binn,
 Ó dh'imigh uaim thar farraige scafaire na mbánchrobh
 Is gurb é dh'airím á rá acu ná casfar faraoir.
 Tá ceo is scamaill dhorcha go follas ar mo láimhe
 Is do dheasca siúd do ráinig gur chailleas féin mo chiall,
 Ach ní chreidfinn óna mhaireann iad, níl aon mhaith dóibh bheith a rá liom
 Dá mbeadh fhios ag mo ghrá é, go dtiocfaidh s' mé a leigheas.
 

 Nach buartha 'bhíonn an láir go dtí an margadh nuair a théann sí
 Go mbíonn an searrach ina diaidh nó go bhfilleann sí aríst
 Is nach buartha 'bhíonn an bhó go mbíonn na madraí ar gach taobh dhi
 Ag búirigh is ag géimnigh le heagla an lao.
 Ní buartha ná mise ó 'theis an leanbh dá dtugas
 Trí ráithe a dh'iompar ar imeall mo chroí
 Mo pháiste bocht ag gol im'dhiaidh ó dh'imigh uaim an father
 Dhe dhrom na gcnocán nó le fuinnemh taoidí.
 

 Ar bhruach geal na Sionna gan athair gan máthair
 A thabharfadh blais 'na láimh dó ná fiú an braon dí,
 Tá mo bha ag teacht sa mhacha chugam, mo chaoiarigh gan áireamh
 Mo chapaill ins an stábla gan chuimilt faraoir.
 Tá m'intinn féin in earraid liom, is an fharraige seo taobh liom
 Is n'fheadar cad é an t-áitreamh nó an baile beag 'na mbír,
 Is mara dtairgse anois abhaile chugam a scafaire na mbánchrobh
 Go dtitfir ins an áit seo lag marbh gan bhrí.
 

 Mo shlánsa chun an té úd nárbh fhéidir a cháineadh
 In aon chath dá dtáinig nó i láthair na dí,
 Mo shlánsa chugat a chiallaigh ba bhinne guth is ráite
 Ná seanchas na bhfáidhí sna ráiteachas grinn
 Is pé bean eile atá anois i ndán duit a scafaire na mbánchrobh
 Is dual di bheith go sásta 'gas mise gan bhrí,
 Ó táimse lag cráite gan chéile gan pháiste
 Gan Dia na glóire, ach ochón de shíor.